एजेन्सी- इटालियन सिरि एको साविक विजेता युभेन्ट्सलाई स्ट्राइकर क्रिस्टियानो रोनाल्डोले हारबाट जोगाएका छन्।
खेलको ६५ मिनेटमा सामी खादिराको स्थानमा मैदान छिरेका रोनाल्डोले ७८ मिनेटमा गोल गरेपछि युभेन्ट्सले एटलान्टासँग २–२ गोलको बराबरी खेल खेल्दै हार टारेको हो।
त्यसअघि युभेन्ट्स १० खेलाडीमा सीमित हुनुका साथै खेलमा २–१ ले पछि परेको थियो।
खेलको दोस्रो मिनेटमा एटलान्टाका जिम्सिटीले आफ्नै पोस्टमा गोल गरेपछि युभेन्ट्सले सुरुवाति अग्रता लिएको थियो।
तर एटलान्टाका जापाटाले २ गोल गर्दा युभेन्ट्स खेलमा पछि पर्यो। जापाटाले खेलको २४ र ५६ मिनेटमा गोल गरेका थिए।
खेलको ५३ मिनेटमा युभेन्ट्स १० खेलाडीमा सीमित बन्दा थप दबाबमा आयो। बेन्टाकुलर दोस्रो पहेँलो कार्ड पाउँदै मैदान छाड्न बाध्य भएका थिए। तर सब्सिच्युट खेलाडीको रुपमा मैदान परेका रोनाल्डोले खेल सकिन १२ मिनेट बाँकी छदा गोल गरेर युभेन्ट्सको हार टारे।
लिगमा शीर्ष स्थानको युभेन्ट्सको १८ खेलबाट ५० अंक छ। दोस्रो स्थानको नापोलीको ४१ र तेस्रो स्थानको इन्टर मिलानको ३६ अंक छ।