एभरेष्ट प्रिमियर लिग (इपिएल) अन्तर्गत आज भएको खेलमा काठमाडौं किंग्स ११ ले विराटनगर वारियर्सलाई ५ विकेटले हराएको छ । जितसँगै काठमाडौं ५ खेलमा ८ अंक सहित अंक तालिकामा दोश्रो भइ पहिलो क्वालिफायरको लागि छनौट भएको छ ।
टस जितेर काठमाडौंले धुम्म परेको वातावरणमा पहिले फिल्डीङ गर्ने निर्णय गरेपछि ब्याटिङ गरेको विराटनगरले १७.५ ओभरमा अलआउट हुँदै १०० रनमात्र बनाउन सक्यो ।
टोलीको लागि सुमित महर्जनले २३ बलमा १ चौका र २ छक्का सहित २५ रन बनाए । त्यस्तै हरि चौहानले २३ बलमा ३ चौका सहित २२ रन बनाए भने पारस खड्काले २१ र बाबर हायातले ११ रन बनाए ।
बलिङतर्फ काठमाडौंका केभिन ओ ब्रायनले ३ ओभरमा १८ रन दिंदै ३ विकेट लिए । त्यस्तै प्रदिप साहु, बिक्रम भुषाल र रोहन मुस्तफाले समान २ विकेट लिएभने जितेन्द्र मुखियाले एक विकेट लिए ।
जवाफी ब्याटिङ गरेको काठमाडौंको लागि केभिन ओ ब्रायनले पारस खड्काको एकै ओभरमा ३ छक्का प्रहार गरे । उनको इनिङको मद्दतले काठमाडौंले १७.५ ओभरमा लक्ष्य पुरा गर्दै ५ विकेटको क्षतिमा १०६ रन बनायो ।
काठमाडौंको लागि केभिनले ४३ बलमा २ चौका र ३ छक्का सहित नटआउट ४५ रन बनाए । सुझबुझपूर्ण इनिङ खेलेका उनले १८ औं ओभरमा मात्र खुलेर खेल्दै छक्का वर्षाएका थिए । त्यस्तै प्रदिप साहुले २३ बलमा नटआउट २२ रन बनाए । अमित श्रेष्ठ र सागर पुनले क्रमशः १४ र १० रनको योगदान गरे ।
बलिङतर्फ रोइलोफ भ्यानडर मर्वा र पारस खड्काले समान २ विकेट लिएभने रोविन क्षेत्रीले १ विकेट लिए । अलराउन्ड प्रदर्शन गरेका केभिन ओ ब्रायन प्लेयर अफ द म्याच घोषित भए ।
लिग चरणको अन्तिम खेलमा काठमाडौंको विजयसँगै प्ले अफको समिकरण पनि पुरा भएको छ । विराटनगर यस खेलमा पराजित भइ कम रन रेटको कारण अंक तालिकाको पाँचौ स्थानमा पुगेपछि चितवन भाग्यमानी साबित भयो । चितवनले समान अंक भएपनि रनरेटले अघि रहँदै इलिमिनेटर खेल्ने अवसर पाएको छ ।
फाइनलमा स्थान बनाउनको लागि मंगलबार हुने पहिलो क्वालिफायरमा काठमाडौं र ललितपुर भिड्नेछन् । विजेता टोलीले फाइनलमा स्थान बनाउनेछ भने हार्ने टोलीले दोश्रो क्वालिफायर खेल्दै पुनः फाइनलमा स्थान बनाउने मौका पाउनेछ ।
बुधबार खेलिने इलिमिनेटरमा भैरहवा र चितवन भिड्नेछन् । विजयी टोलीले बिहिबार हुने दोश्रो क्वालिफायर खेल्ने मौका पाउनेछ । फाइनल आगामी शनिबार हुनेछ ।