इरान एसियन कपको सेमिफाइनलमा प्रवेश गरेको छ । चीनलाई ३–० ले हराउँदै इरान अन्तिम चारमा पुग्न सफल भयो ।
यूएईको आबुधावीमा रहेकाे मोहम्मद विन जायद स्टेडियममा भएको खेलमा इरानको जितमा मेहदी तारेमी, सरदार अज्मउन र करिम अन्सारिफार्दले एक एक गोल गरे । तारेमीले १८औं मिनेटमा गोल गर्दै इरानलाई अग्रता दिलाएका थिए ।
३१औं मिनेटमा अज्मउनले गोल गरेपछि इरानले पहिलो हाफमा दुई गोलको अग्रता लिएको थियो । दोस्रो हाफको इन्ज्युरी समयमा अन्सारिफार्दले गोल गरेपछि इरान सहजरुपमा सेमिफाइनलमा पुगेको हो ।
यसअघि भियतनामलाई १–० ले हराउँदै जापान सेमिफाइनलमा पुगिसकेको छ । बिहीबार राति भएको खेलमा जापानले भियतनामलाई १–० गोल अन्तरले पराजित गर्दै अन्तिम चारमा स्थान सुरक्षित गरेको हो ।
पहिलो हाफमा दुवै टिमले गोलरहित बराबरी खेले पनि निर्णायक गोल जापानले दोस्रो हाफमा गरेको हो । भियतनामका खेलाडीले डिबक्सभित्र फल गरेपछि पाएको पेनाल्टीलाई जापानले गोलमा परिणत गरेको हो ।
सेमिफाइनलमा इरानको भेट जापानसँग हुनेछ ।