काठमाडौँ : अखिल नेपाल फुटबल संघ (एन्फा)ले नेपाल स्पोर्ट्स एण्ड इभेन्ट म्यानेजमेन्ट (एनएसइएम) सँगको सहकार्यमा नेपालमै पहिलो पटक फ्रेन्चाइज फुटबल प्रतियोगिता आयोजना गर्ने भएको छ।
नेपाल सुपर लिग (एनएसए) नाम दिइएको उक्त प्रतियोगिता अर्को वर्षको बैशाख-जेठमा आयोजना गर्ने एन्फा अध्यक्ष कर्मा छिरिङ शेर्पाले जानकारी दिए।
एनएसएल आयोजनाका लागि एन्फाले एनएसइमसँग मंगलवार सम्झौता समेत गरेको छ। सम्झौतामा एन्फा अध्यक्ष शेर्पा र एनएसइएमका अध्यक्ष निर्वाण चौधरीले हस्ताक्षर गरे।
एन्फाले यो सम्झौतालाई ऐतिहासिक मानेको छ र यसले नेपाली फुटबल विकासमा सहयोग गर्ने उनीहरुको विश्वास छ। यस्तै ग्रासरुट लेभलबाटै फुटबलको विकास गर्न भन्दै एन्फाले स्कुल लिग समेत गर्ने भएको छ।
‘हामीले एनएसइएमसँग दुई प्रतियोगिताको लागि सम्झौता गरेका छौँ। एउटा एनएसएल, अर्को स्कुल लिग। ग्रासरुट फुटबल विकासको लागि हामीले देशको विभिन्न ११ शहरमा स्कुल लिग गर्ने भएका छौँ।’ एन्फा अध्यक्ष शेर्पाले भने।
यसैगरी स्कुल लिगको सुरुवात पनि अर्को वर्ष बैशाखमा गर्ने र माघ-फागुनमा सकाउने लक्ष्य रहेको एन्फा अध्यक्ष शेर्पाले जानकारी दिए। ‘हामी विद्यार्थीको पढाईलाई असर नपुग्ने गरी छुट्टीको समयमा यो प्रतियोगिता गर्छौँ। हाम्रो टार्गेट भनेको देशभरको विद्यार्थीमाझ पुग्ने हो। स्कुल लिगबाट ३०-४० जना फुटबलर जन्माउन सक्यौँ भनेपनि ठूलो उपलब्धी हुनेछ हुनेछ। एन्फासँगै स्कुलहरुले समेत स्कुल लिगबाट खेलाडी स्काउट गर्न सक्छन्।’ एन्फा अध्यक्ष शेर्पाले भने।