काठमाडौं, तीन खेलको एकदिवसीय अन्तर्राष्ट्रिय क्रिकेट सिरिजको अन्तिम खेलमा नेपाललाई युएईले २५५ रनको लक्ष्य दिएको छ ।आईसीसी क्रिकेट एकेडेमीमा टस हारेर पहिले ब्याटिङ गरेको युएईले निर्धारित ५० ओभरमा ६ विकेटको क्षतिमा २ सय ५४ रन बनाएको हो ।
पहिलो विकेटको रुपमा २.५ ओभरमा अस्फाक अहमद सोमपाल कामीको बलमा शून्यमै आउट भए । दोस्रो विकेटको रुपमा ५.६ ओभरमा अर्का ओपनर चिराग सुरी पनि शून्य रनमै आउट हुँदा युएईले जम्मा २ रन जोडेको थियो ।
युएईका अग्रपंक्तिका ब्याट्सम्यानले राम्रो गर्न नसके पनि मध्यमक्रमका ब्याट्सम्यानले उत्कृष्ट प्रदर्शन गरेका थिए । युएईका लागि शैमान अनवर र मोहम्मद बुताले उत्कृष्ट ब्याटिङ गरे । अनवरले ८७ रन जोड्दा बुताले ५९ रन जोडेका थिए । सिपी रिजवानले ४५, मोहम्मद उस्मानले २६ र घुलाम शब्बेरले १८ रन बनाए ।
नेपालका लागि करण केसीले दुई विकेट लिए। सन्दीप लामिछाने, कप्तान पारस खड्का र सोमपाल कामीले समान १–१ विकेट लिए ।