काठमाडौं – राष्ट्रिय टोलीबाट डेब्यु गरेको एक वर्ष नबित्दै नेपालका युवा ब्याट्सम्यान रोहितकुमार पौडेल विश्व क्रिकेट जगतमा पुरुषतर्फ अर्धशतक पूरा गर्ने सबैभन्दा कान्छो खेलाडी बनेका छन्।
रोहितले शनिबार दुबईस्थित आइसिसी एकेडेमीको मैदानमा भएको युएईविरुद्धको दोस्रो एकदिवसीय खेलमा अर्धशतक पूरा गर्दै भारतका ब्याट्सम्यान सचिन तेन्दुल्कर र पाकिस्तानका पूर्वकप्तान साहिद अफ्रिदीलाई पछि पारेका हुन्। रोहितले १६ वर्ष एक सय ४६ दिन उमेरमा यो कीर्तिमान तोडेका छन्।
यसअघि यो कीर्तिमान टेस्टतर्फ तेन्दुल्करको र एकदिवसीयतर्फ अफ्रिदीको नाममा थियो। तेन्दुल्करले १६ वर्ष दुई सय १३ दिनमा पाकिस्तानविरुद्धको टेस्टमा ५९ रन जोड्दै कीर्तिमान बनाएका थिए। अफ्रिदीले सन् १९९६ अक्टोबर ४ मा १६ वर्ष दुई सय १७ दिनमा श्रीलंकाविरुद्ध डेब्युमै उक्त कीर्तिमान बनाएका थिए।
यद्यपि, अन्तर्राष्ट्रिय क्रिकेटमा सबैभन्दा कम उमेरमा अर्धशतक पूरा गर्ने कीर्तिमान भने दक्षिण अफ्रिकाकी जोमारी लोतेन्बर्गको नाममा छ। लोतेन्बर्गले १४ वर्षमै टेस्ट र एकदिवसीयमा अर्धशतक प्रहार गरेकी थिइन्।
रोहितले युएईविरुद्ध ५८ बलमा ७ चौका मद्दतमा ५५ रनको योगदान गरेका थिए। शुक्रबारको पहिलो खेलमा अवसर नपाएका रोहित शनिबार वसन्त रेग्मीको स्थानमा मैदान उत्रिएका थिए। जुन अवसर सदुपयोग गर्दै रोहित अर्धशतकका साथै विश्व कीर्तिमान पनि रच्न सफल भए। रोहितले खेलअघि कीर्तिमानको बारेमा अनविज्ञ रहेको प्रतिक्रिया दिँदै आगामी खेलमा स्वाभाविक लयलाई निरन्तरता दिन विश्वास व्यक्त गरे। उनले यो कीर्तिमान अझै पनि सपनाजस्तो लागेको बताएका छन्।