बलियो क्वेट्टा ग्लाडियटर्सलाई ८ विकेटले हराएको लाहोर कलन्दर्सले आज राती ९ः४५ मा कराँची किंग्सको सामना गर्देछ ।
पाकिस्तान सुपर लिग (पीएसएल) को ६ खेलमा ३ जितसहित ६ अंकका साथ अंक तालिकाको चौथो स्थानमा रहेको लाहोरको लागि पछिल्लो खेलमा सन्दीप लामिछानेले ४ ओभरमा १० रन दिइ ४ विकेट लिएका थिए । उक्त प्रदर्शनको बलमा टोलीलाई जिताएका उनि प्लेयर अफ द म्याच घोषित भएका थिए ।
ब्याटिङमा पनि बलियो प्रदर्शन गर्दै जित दर्ता गरेको लाहोरले आजको खेलमा कराँचीलाई हराइ महत्वपूर्ण २ अंक जोड्ने प्रयास गर्ने बुझिएको छ ।
लाहोरले यसअघि यहि प्रतियोगिताको पहिलो लेग खेलमा कराँचीलाई २२ रनले हराएको थियो । ६ खेलमा ४ अंकमात्र जोडेको कराँची अहिले अंक तालिकाको पुछारमा रहेको छ । यद्यपी कराँचीमा मोहम्मद रिजवान, बाबर आजम, इमाद वासिम, रवी बोपारा, कोलिन इंग्राम र मोहम्मद आमिर जस्ता खेलाडी भएकाले कराँची कमजोर टोली भने होइन ।
यस खेलमा जित हात पार्न सके लाहोरले शिर्ष स्थानमा रहेको इस्लामावादसँग अंकको आधारमा बराबरी भने गर्नेछ । यद्यपी लाहोर रनरेट हालसम्म ऋणात्मक नै रहेको छ । पछिल्लो खेलमा टी–२० क्रिकेट खेल जिवनकै उत्कृष्ट प्रदर्शन गरेका सन्दीप यो खेलमा पनि प्रारम्भीक छनौटमा पर्ने पक्का नै रहेको छ ।
लिग चरण अन्तर्गत अब ४ खेलमात्र खेल्न बाँकि भएकोले पनि लाहोरको लक्ष्य शिर्ष दुईमा पर्ने रहेको बुझिएको छ ।