काठमाडौं– अनुमान योग्य ब्याजदर बनाउन अर्थमन्त्री डा. युवराज खतिवडाले बैंकलाई आग्रह गरेका छन् । बिहिबार होटल याक एन्ड यतिमा भएको नेपाल इन्टरप्रिनरसिप समिटमा बोल्दै अर्थमन्त्री खतिवडाले बैंकको ब्याजदरमा निरन्तर घटबढ हुँदा लगानीको वातारवरण नबनेको बताए ।
पछिल्लो समय बैंकहरुले निरन्तर ब्याजदरमा वृद्धि गरेपनि उद्योगीहरु आन्दोलित भएका थिए । बैंकले भने तरलताका कारण ब्याजदरमा वृद्धि गर्नुपरेको बताइरहेका छन् ।
कार्यक्रममा बोल्दै मन्त्री खतिवडाले बैंकको ब्याजदर दीर्घकालीन प्रकृतिको नहुँदा लगानीको जोखिम बढेको बताए । लगानी गर्ने क्रममा एउटा ब्याजदर हुने र त्यस लगत्तै बढ्ने गरेका कारण व्यावसायिक सुनिश्चितता नभएको बताए ।पछिल्लो समयमा बैंकको पुँजी वृद्धि तथा मुद्धती निक्षेप पनि वृद्धि भएको बताउँदै मन्त्री खतिवडाले विदेशी मुद्रामा लगानी गर्न पाइने र ऋणपत्र समेत जारी गरेकाले बैंकहरुलाई तरलता समस्या समाधान गर्न सहज भएको तर्क गरे ।
‘मैले बैंकका साथीहरुलाई विशेष आग्रह गर्छु, कम्तीमा पनि पाँच वर्ष स्थिर ब्याजदरमा ऋण दिने व्यवस्था गर्नुहोस्,’ मन्त्री खतिवडाले भने । बैंकको ब्याजदरले नै व्यवसायी तथा उद्योगीको लगानी भर पर्ने उनले दावी गरे । उनले भने, ‘तपाईहरुले (बैंकले) अनुमान योग्य ब्याजदर निर्धारण गर्नुभयो भने उद्योगीहरुले ढुक्कले लगानी गर्न सक्छन् ।’ब्याजदरले गर्दा पुर्वाधारमा लगानी गर्न असहज भएको उनको तर्क थियो । ‘मैले बैंकको सबै पैसा त्यसरी नै लगानी गर्नुहोस् भनेको होइन, केही रकम स्थिर व्याजदरमा दीर्घकालीन लगानीको क्षेत्रमा जस्तै पुर्वाधारको क्षेत्रमा लगानी गर्नुहोस् ।’ मन्त्री खतिवडाले भने ।
जलविद्युत तथा अन्य पुर्वाधारको लागि अनुमान योग्य ब्याजदर निर्धारण नगर्दा, व्यवसायीहरु निरुत्साहित हुने भन्दै उनले बैंकलाई ब्याजदर समस्या समाधान गर्न विशेष आग्रह गरे ।