काश्मिरको पुलावामा भारतीय सेनामाथी आत्मघाती आक्रमण भएयता यि दुई राष्ट्रबीच तनाव उत्पन्न भएको छ ।
४६ जवान भारतीय सेनाको मृत्यु भएको यस आक्रमणको दोष भारतले पाकिस्तानलाई दिइराखेको छ । सोही कारण भारतले पाकिस्तानी भुमिमा प्रवेश गरी बम पनि खसालीसकेको छ । उक्त आक्रमण सुनसान क्षेत्रमा भएकोले कुनै मानवीय क्षति भने भएन ।
उक्त विवादको असर जन स्तरमा पनि त्यत्तिकै परिराखेको छ । विशेषगरी इंग्ल्याण्डको म्यानचेष्टरमा आयोजना हुने भारत–पाकिस्तान बिचको विश्वकपको लिग चरणको खेल खेल्न नहुने आवाजले भारतमा महत्व पाइरहेको छ ।
क्रिकेटर हरभजन सिंहले भारतले पाकिस्तानसँग खेल्न नहुने धारणा सार्वजनिक गरिसकेका छन् भने भारतले अन्तर्राष्ट्रिय क्रिकेट काउन्सिल (आईसीसी) को बैठकमा यो खेल रद्द गराउने प्रयास गर्ने बुझिएको छ ।
यस्तोमा भारत–पाकिस्तानको विवादको असर फुटबलमा पनि पर्ने देखिएको छ । आगामी मार्च २६ मा उज्वेकिस्तानमा हुने एएफसी यू–२३ च्याम्पीयन्सीपमा भारत र पाकिस्तान खेल्ने तालिका रहेको छ ।
भारतीय फुटबल टोलीका पूर्व कप्तान भास्कर गांगुलीले उक्त खेल भारतले खेल्न नहुने धारणा सार्वजनिक गरिसकेको छन् । तथापी भारतीय फुटबल महासंघले यसको निर्णय गर्ने जिम्मेवारी सरकारलाई दिइसकेको छ ।
महासंघको निर्णयले मात्रै नहुने भन्दै सरकारलाई निर्णय गर्न लगाएपछि फुटबलको पनि भविष्य अनिश्चीत भएको छ । भारतीय फुटबलर सुनिल क्षेत्रीले भने यस विषयमा आफ्नो धारणा दिन अस्विकार गरेका छन् ।