नेपाल वायु सेवा निगमको एयरबस ३३० वाइडबडी विमान खरीद प्रकरणमा जोडिएका सबैलाई अनुसन्धानको दायरामा ल्याइने अख्तियार दुरुपयोग अनुसन्धान आयोगका प्रमुख नवीन घिमिरेले बताएका छन् ।
राष्ट्रिय सभाको दिगो विकास तथा सुशासन समितिमा आइतवार सांसदहरूले सोधेको प्रश्नको जवाफ दिँदै घिमिरेले उक्त प्रकरणमा विस्तृत छानबिन भइरहेको जानकारी दिए । खरीद प्रक्रियाका प्रमाणहरू संकलन तथा त्यसमा जोडिएका व्यक्तिहरूसँग बयान लिन शुरू गरिसकेको उनले बताए । ‘अख्तियारले आफ्नो अधिकार क्षेत्रअन्तर्गत रहेर यस विषयमा अनुसन्धान गर्नेछ,’ घिमिरेले भने ।
उक्त प्रकरणबारे संसद्को सार्वजनिक लेखा समिति अन्तर्गत गठित उपसमितिले पुस १८ मा दुई पूर्वपर्यटनमन्त्री, बहालवाला मन्त्री, सचिव र निगमका महाप्रबन्धक सहित ३४ जनालाई दोषी ठहर गर्दै प्रतिवेदन सार्वजनिक गरेको थियो । उपसमितिले वाइडबडी प्रकरणमा ४ अर्ब ३५ करोड ५६ लाख रुपैयाँ भ्रष्टाचार भएको प्रतिवेदन सर्वसम्मतिले पारित गरेको थियो ।
यस प्रकरणमा छानबिन गर्न सरकारले पुस ३० मा गठन गरेको उच्चस्तरीय जाँचबुझ आयोगको समय भने नियुक्त पदाधिकारीहरूलाई त्यससम्बन्धी पत्रसमेत नदिई सकिएको छ ।
अख्तियारले आफ्ना पूर्वआयुक्त राजनारायण पाठकमाथि पनि छानबिन शुरू गरेको घिमिरेले जानकारी दिए । उनका अनुसार सहसचिवको नेतृत्वमा पाठकमाथि अनुसन्धान शुरू भएको छ । ‘कानूनी रूपमा संवैधानिक आयोगका पदाधिकारीमाथि अनुसन्धान गर्न सक्ने स्पष्ट व्यवस्था छैन, तर महान्यायाधिवक्तासँग छलफल गरेर यस विषयमा अनुसन्धान अघि बढाएका छौं,’ उनले भने, ‘भ्रष्टाचार नियन्त्रण र सुशासन आयोगको एक मात्र एजेन्डा हो । त्यसैले अख्तियारमा रहेको वा बाहिरको कुनै पनि व्यक्तिले भ्रष्टाचारबाट उन्मुक्ति पाउन हुँदैन ।’