नेपालको पहिलो महिला फ्रेन्चाईज क्रिकेट लिग ‘एनसीएल’ वुमन्स टी-ट्वान्टी क्रिकेट’ लिग आगामी वैशाख दोस्रो साताबाट हुने भएको छ।
विराटनगरको बैजनाथ क्रिकेट मैदानमा वैशाख ७ देखि १४ सम्म हुने प्रतियोगिताको विजेताले १० लाख नगद पुरस्कार प्राप्त गर्नेछ। यस अघि चैत १ गतेबाट हुने भनिएको प्रतियोगिता सुदूरपश्चिममा भएको मुख्यमन्त्री कपका कारण सारिएको आयोजक एनसीएल स्पोर्टस प्रालीले जानकारी दिएको छ।
यस्तै प्रतियोगिताको उपविजेताले ५ लाख पाउने छ भने प्लेयर अफ दी म्याचले १० हजार पाउने प्रालीका प्रबन्ध निर्देशक जयराज रायले जानकारी दिए। प्रतियोगिताको पहिलो संस्करणमा काठमाडौं सुपर च्याम्पियन, विराटनगर रोअरिङ लायोनेस, भैरहवा क्विन्स र धनगढी वन्डर वुमनले प्रतिस्पर्धा गर्ने छन्।
प्रतियोगितामा सहभागी हुने चारवटै टोलीको मार्की खेलाडी पनि घोषणा गरिएको छ। जसमा काठमाडौंकी नेरी थापा, विराटनगरकी करुणा भण्डारी, भैरहवाको रुबिना क्षेत्री र धनगढीकी सिता राना मगर रहेकी छिन्।
प्रतियोगिताका लागि अक्सनबाट खेलाडी छनोट गरिने आयोजकले जानकारी दिएको छ।