नेपालमै पहिलो सडक निर्माण हुन लागेकाे सुरुङमार्ग र फ्लाई ओभरकाे शिलान्यास भएकाे छ । सोमबार अपराह्न ३ बजे प्रधानमन्त्री केपी ओलीले नागढुंगा–सिस्नेखोला सुरुङको शिलान्यास गरेका हुन् । त्यससँगै पहिलो सडक सुरुङमार्ग निर्माणको औपचारिक थालनी हुने भएकाे हाे ।
सुरुङमार्ग निर्माण कम्पनी जापानकाे हाज्मा आन्दो कर्पोरेसनले जग्गा भाडामा लिएर क्याम्प निर्माण थालिसकेको छ । सुरुङमार्गकै अंग हुने गरी दुई फ्लाई ओभर निर्माण हुँदै छन् । नेपालमा फ्लाई ओभर पनि पहिलो पटक निर्माण हुन लागेको हो । दुई फ्लाई ओभरमध्ये एउटा अहिलेको सडक ट्राफिकलाई अवरोध नपुगोस् भनेर कलंकी–नागढुंगा सडक खण्डको बलम्बुमा निर्माण गरिनेछ । यसले त्रिभुवन राजपथमा सवारी आवात–जावतलाई सुरु गर्नेछ ।
अर्को फ्लाई ओभर भने नागढुंगा जोड्ने स्थानीय सडकमा रहनेछ । सुरुङ निर्माणले नेपालमा जापानी प्रविधि भित्र्याउने महत्वपूर्ण भूमिका खेल्ने सडक विभागको भनाइ छ ।