संघीय संसद सचिवालयले प्रतिनिधिसभाको वेबसाइटबाट कृष्णबहादुर महराको नाम हटाएको छ। वेबसाइटको होमपेजमा सभामुख र उपसभामुखको फोटोसहितको प्रोफाइल लिंक हुन्छ।त्यहाँ सभामुखको ठाउँ खाली राखिएको छ। संघीय संसद् सचिवालयमा कार्यरत एक महिला कर्मचारीले महरामाथि बलात्कारको आरोप लगाएपछि महराले सभामुख पदबाट मंगलबार राजीनामा दिएका थिए।
अघिल्लो दिन महराले दिएको राजीनामा पत्रमा छानबिन प्रक्रिया नसकिँदासम्मका लागि’ भनेर शर्त राखिएको थियो तर दोस्रो राजीनामा पत्रमा यो शर्त हटाइएको छ। मंगलबारको राजीनामा पत्र उपसभामुख तुम्बाहाङ्फेले अस्वीकृत गरेपछि महराले मंगलबारकै मिति राखेर बुधबार अर्को राजीनामा पत्र बुझाएका थिए।
‘उपसभामुखको आदेशअनुसार’ भन्दै संघीय संसद् प्रतिनिधिसभा सचिवालय सचिव डा. भरतमणि गौतमले सभामुखको राजीनामाको सूचना प्रकाशन गरेका हुन्।