काठमाडौं । युनाइटेड अरब इमिरेट्स (यूएई)विरुद्ध माघ दोस्रो साता हुने एकदिवसीय अन्तर्राष्ट्रिय र ट्वान्टी–२० अन्तर्राष्टिय खेलका लागि नेपालले २० खेलाडीलाई लागि बन्द प्रशिक्षणमा बोलाएको छ । पुस २४ गतेबाट काठमाडौंमा हुने प्रशिक्षणका लागि पारस खड्का, अविनास बोहरा, वसन्त रेग्मी, भिम सार्की, विक्रम सोब, विनोद भण्डारी, दीपेन्द्रसिंह ऐरी, ज्ञानेन्द्र मल्ल, करण केसी, ललितसिंह भण्डारी, ललितनारायण राजवंशी, आरिफ शेख, पवन सर्राफ, प्रदीप ऐरी, रोहितकुमार पौडेल, सन्दीप लामिछाने, शरद भेषावकर, सोमपाल कामी, सन्दीप जोरा र सुसन भारी रहेका छन् ।
बिग बास लिगका लागि अहिले अस्ट्रेलिया भ्रमणमा रहेका सन्दीप लामिछाने दुबईमै टोलीसँग मिसिनेछन् । नेपालले बन्द प्रशिक्षण शुरु गर्दा कप्तान पारस खड्का र दीपेन्द्रसिंह ऐरी पनि टोलीमा हुने छैनन् । उनीहरु अहिले नेपाली क्रिकेटको प्रवद्र्धन गर्न भन्दै अस्ट्रेलिया भ्रमणमा छन् ।
आईसिसीका प्रतिनिधि अमिनुल इस्लामको संयोजकत्वमा मुख्य प्रशिक्षक जगत टमाटा र कप्तान पारस खड्का सम्मिलित छनोट टोलीले यो खेलाडी छनोट गरेको हो । २० सदस्यीय टोलीमा पवन, भिम, अविनास र सन्दीप जोरा नयाँ अनुहार हुन् । टोलीमा अनिलकुमार साह भने परेका छैनन् ।
एकदिवसीय अन्तर्राष्ट्रिय मान्यता पाएपछि नेपालले खेल्न लागेको यो दोस्रो एकदिवसीय अन्तर्राष्ट्रिय शृंखला हो भने ट्वान्टी–२० अन्तर्राष्ट्रिय पहिलो हो । यसअघि नेदरल्यान्ड्ससँग दुई खेलको एकदिवसीय शृंखला खेलेको थियो । उक्त शृंखला १–१ को बराबरीमा टुंगिएको थियो ।