नेपाली राष्ट्रिय महिला फुटबल टिमका दुई सदस्य सावित्रा भण्डारी र अनिता बस्नेत विदेशी लिग खेल्न भोली भारत जाँदैछन्। उनीहरु नेपालबाट विदेशी लिग खेल्ने पहिलो खेलाडी बन्दैछन्।
दुवै राष्ट्रिय टिमका महत्वपूर्ण सदस्य हुन् भने घरेलु फुटबलमा एपीएफबाट खेल्दै आएका छन्।सावित्रा र अनिताले भारतमा हुने हिरो इन्डियन वुमन्स लिगमा सेथु एफसीबाट खेल्नेछन्। अखिल नेपाल फुटबल संघ एन्फाले आइतवार दुवै खेलाडीलाई बिदाई गरेको छन।
सावित्रा र अनिताले गत वर्ष माल्दिभ्समा फुटसल खेलेका थिए। हिरो वुमन्स लिगको तेस्रो संस्करण खेल्न लागेका हुन्। सेथुसहित सात क्लब समूह बी मा छन्। यस्तै समूह ए मा पनि ७ क्लब नै छन्।मे ५ देखि सुरु हुने लिगमा कूल १४ टोलीको सहभागिता रहनेछ। लिगका सबै खेलहरु गुरु नानक स्टेडियम लुधियानामा हुनेछ।
दुबै समूहबाट शीर्ष दुई स्थानमा रहने टोली सेमिफाइनलमा पुग्नेछन् । लिग चरणका खेलहरु मे १८ सम्म हुनेछ भने सेमिफाइनल खेलहरु मे २० मा र फाइनल मे २२ मा हुनेछ। राइजिङ स्टुडेन्स क्लब डिफेन्डिङ च्याम्पियन हो।