नेदरल्याण्डस नेशन्स लिग फुटबलको फाइनलमा प्रवेश गरेको छ ।
युरोपियन फुटबलको प्रशासकीय निकाय युइएफएले पहिलोपटक आयोजना गरेको प्रतिस्पर्धाको सेमिफाइनल अन्तर्गत बिहीबार राति भएको खेलमा इंग्ल्याण्डलाई पराजित गरेर नेरदल्याण्डसले फाइनलमा स्थान पक्का गरेको हो । पोर्चुगलको गुइमारिसमा भएको खेलमा इंग्ल्याण्डको रक्षापंक्ति निकै कमजोर देखियो । यसकै फाइदा उठाउँदै नेदरल्याण्डले ३-१ को जित निकाल्दै फाइनलमा पोर्चुगलसँगको भेट पक्का गरेको छ । इंग्ल्याण्डका लागि अतिरिक्त समय घातक बनेको हो ।
खेलमा सुरुवाति अग्रता इंग्ल्याण्डले लिएको थियो । ३२ औँ मिनेटमा पाएको पेनाल्टी अवसरलाई सदुपयोग गर्दै मार्कस रासफोर्डले गोल गरेका हुन् । पहिलो हाफमा पछि परेको नेदरल्याण्डसका लागि ७३ औँ मिनेटमा माथिस डी लिग्टले गोल गरे । उनको गोलले खेल अतिरिक्त समयमा धकेलियो । अतिरिक्त समय इंग्ल्याण्डका लागि खरब बन्यो ९७ औँ मिनेटमा इंग्ल्याण्डका केली वाल्करले आत्मघाती गोल गरे ।
यस्तै ११४ औँ मिनेटमा क्वीन्सी प्रोमेसले गोल गरेपछि नेदरल्याण्डस ३-१ ले विजयी भएको हो । अब उसले उपाधिका लागि आउँदो आइतबार घरेलु टोली पोर्चुगलसँग पोर्टोमा प्रतिस्पर्धा गर्नेछ । पहिलो सेमिफाइनलमा स्वीट्जरल्याण्डलाई हराउँदै पोर्चुगलले फाइनलमा स्थान बनाइसकेको छ ।