काठमाडौं । इलिमिनेटर खेलमा भैरहवा ग्लाडियटर्सले बुधबार चितवन टाइगर्सलाई ४ विकेटले पराजित गर्दै ईपीएल क्वालिफायर्समा काठमाडौं किंग्स—११ सँगको भेट पक्का गरेको छ ।
कीर्तिपुरस्थित त्रिवि क्रिकेट मैदानमा टस हारेर ब्याटिङका लागि निम्त्याइएको चितवन टाइगर्सले निर्धारित २० ओभरमा ८ विकेट गुमाएर १ सय ३९ रनको योगफल बनाएको थियो । १ सय ४० रनको लक्ष्य पछ्याएको भैरहवाले १८.२ ओभरमा ६ विकेट गुमाएर पूरा गरेको थियो । विजयी भैरहवाले अब बिहीबार हुने दोस्रो क्वालिफायरमा काठमाडौं किंग्स–११ विरुद्ध फाइनलका लागि प्रतिस्पर्धा गर्नेछ ।
कमलसिंह ऐरीले दुई र ललितसिंह भण्डारीले एक विकेट लिएपछि भैरहवाले राम्रो सुरुआत गर्न सकेको थिएन । मोहम्मद नाभेद र रवि इन्दर सिंहले समान ४ रन बनाएर आउट हुँदा रायन टेन डोस्काटे शून्यमा पवेलियन फर्किएका थिए । तर ओपनर प्रदीप ऐरी र कप्तान शरद भेषावकरले चौथो विकेटका लागि ५६ रनको साझेदारी गर्दै भैरहवाको इनिङ उकासेका थिए । ३८ बलमा ६ चौकासहित ४२ रन बनाएका प्रदीपलाई कमलसिंह ऐरीले विकेटकिपर जोन सिम्पसनमार्फत् क्याच गरे । २९ रन बनाएका कप्तान शरदले पनि दीपेन्द्रसिंह ऐरीको बलमा पृथु बास्कोटालाई क्याच थमाए । लगत्तै आरिफ शेख पनि आउट भएपछि भैरहवा दबाबमा परेको थियो । १४.२ ओभरमा आरिफ आउट हुँदा भैरहवा ९१–६ को अवस्थामा थियो । त्यसपछि रोहितकुमार पौडेल र कुशल मल्लले सातौं विकेटका लागि ४९ रनको साझेदारी गर्दै ४ विकेटको जित दिलाएका थिए । रोहितकुमार पौडेलले १४ बलमा अविजित २४ रन बनाउँदा १३ बल खेलेका कुशल २७ रनमा अविजित रहे ।
दोस्रो क्वालिफायर राउण्डमा प्रवेश गरेको भैरहवाले फाइनल प्रवेशको लागि काठमाडौं किंग्स एलाभेनसँग प्रतिस्पर्धा गर्नेछ । काठमाडौंलाई एक विकेटले पराजित गर्दै ललितपुर प्याट्रिएटस भने ईपीएलको फाइनलमा प्रवेश गरिसकेको छ ।