काठमाडौं । निकटतम प्रतिद्वन्द्वी सिएमजी क्लब संकटामाथि बिहीबार ३–१ को जित हासिल गर्दै साविक विजेता मनाङ मर्स्याङदी क्लबले दुई खेलअघि नै सहिद स्मारक ‘ए’ डिभिजन लिगको उपाधि उचालेको छ ।
नेपाली क्लब फुटबलमा सबैभन्दा सफल टोली मनाङलाई कीर्तिमानी आठौं पटक शीर्ष डिभिजनको लिग च्याम्पियन बनाउने क्रममा सातदोबाटो मैदानमा संकटाविरुद्ध विशाल राई, एडेलाजा सोमिडे र वैकल्पिक खेलाडी पुजन उपरकोटीले गोल गरे । तथापि टोलीको जितमा नायकको भूमिका भने विशालको रह्यो । एक गोल आफैं गरेका विशालले बाँकी दुई गोलका लागि अवसर सिर्जना गरेका थिए ।
बिहीबारको जितपछि ११ खेलमा ३३ अंक जोडेको मनाङले दोस्रो स्थानको संकटालाई ८ अंकले पछि छोड्यो । जसका कारण बाँकी रहेका दुई खेलमा जस्तोसुकै नतिजा आए पनि मनाङको उपाधि यात्रालाई त्यसले कुनै असर गर्दैन ।
पहिलो हाफको इन्जुरी समयमा विशालको कर्नरलाई संकटाका गोलकिपर राजाबाबु थापाले क्लियर गर्ने क्रममा आत्मघाति गोल भएको थियो । वैकल्पिक खेलाडी पुजनले विशालको कर्नरमा गोल गर्दै मनाङको अग्रता दोब्बर बनाए । उनी एक मिनेट अघिमात्र सुजल श्रेष्ठको स्थानमा मैदान प्रवेश गरेका थिए । विशालको क्रसलाई एडेलाजाले पोस्टको दिशा दिएका थिए । सेड्रीक ओलावाले अन्तिम मिनेटमा गरेको गोल संकटाका लागी सान्त्वना बन्यो ।
त्यसअघि ६२औं मिनेटमा अन्जन विष्टले अग्रता दोब्बर बनाउने राम्रो मौका गुमाए । अवालेले दिएको पासमा अन्जनले पेनाल्टी क्षेत्रबाट हानेको प्रहार संकटाका गोलकिपरले उत्कृष्ट बचाउ गरे । ६८औं मिनेटमा हेमन गुरुङ अभागी रहे । उनले हानेको फ्रीकिक क्रसबार भित्र लागेर पनि गोल लाउन पार गर्न सकेन ।
नवौं मिनेटमा कमल श्रेष्ठले हानेको फ्रीकिक पोष्टमा लागेर फर्किएपछि मनाङले अग्रता लिने मौका गुमायो । १५औं मिनेटमा अन्जनले दिएको पासमा हेमन गुरुङले झन्डै २५ यार्डबाट हानेको लामो प्रहार पनि क्रसबारमा लागेर फर्किएको थियो । ३३औं अफिज ओलावाले गोलको अर्को राम्रो अवसर खेर फाले । कमलको क्रसमा पेनाल्टी बक्सभित्र कसैको निगरानीमा नरहेका ओलावालेले गरेको हेड थोरैले बाहिरिएको थियो ।
४२औं मिनेटमा सरोज धितालको क्रसमा लक्ष्मण रूचालले पेनाल्टी बक्सबाट गरेको हेड सिधै मनाङका गोककिपर विशाल श्रेष्ठले हातमा पुगेको थियो । ४७औं मिनेटमा सुवास गुरूङले दायाँ कर्नरबाट गरेको क्रसमा एलोन म्याक्सवेलले ६ यार्ड बक्सभित्रबाट गरेको हेड पनि थोरैले बाहिरिएको थियो ।